بلياك ما اعيش

بلياك ما اعيش
قصيدة روعة للشاعر المبدع ايهاب المالكي
بلياك ما اعيش
بلياك ما اعيش
الي يكلك عشت
بعيوني احلفك منه تاخذ حذر
اني اطمان يمك
واذا تبتعد من كل شي يمي اني احس بخطر
الليل يدري شكد احبك
لان وياك عيني تستلذ بالسهر
اذبل لحد ما ارتوي بشوفتك
جن سنبلة الروح وعشرتك نهر
بلياك كلشي يصير ما بيه طعم
ما اميز بين الورد والصخر
تمطر ترافه واني اخضر غزل
وبكاع جفي قلمي يطرح ثمر
لو راد ياخذني القدر كلي لك
بس لا بيني وبينك يمر قدر
علمت روحي من صغر شوفتك
ردتك صدك تبقى نقش عالحجر
تشتاك الك عيني اذا سافرت
مثل النوارس من تحن للبحر
اني شسوي بالنظر لو رحت
من تمشي كلي حتى اظم النظر
ما ادور بحبك خسارة وربح
ما افكر بقلبي ربح لو خسر
كل اليهمني اني احبك فقط
حب لونه صافي ابيض من الكمر
طير انت من مر بسما دنيتي
وكر وعلى روحي وعليهة استقر
يسكت غصن خلكي كبل لا تجي
ينتظرك الريح الي تحرك الشجر
بلياك قلبي يصير ما بي نفع
شيفيد كلي الغيم الي بلا مطر!
عين الي اشوفك بيهة احس تختلف
مو نفس عين الي اشوف البيهة البشر
مرات احجي صورتك الي عالورق
من اخلط احساسي ويا لون الصور
امشي بحياتي وامعن بخطوتك
حتى من اتيهك عالاقل الكه اثر
اني من اعوفك جدمي يمشي بثكل
ثكل الجدام المالة من السفر
ومن تمشي عني الكون احس يختنك
والعالم بكبره احس بيه زغر
بس لمن ترد لي ارد اكتشف
كل شي بمكانه وانت حبك كبر
وانت حبك كبر
وانت حبك كبر